بنتولد

mawlood.blogspot.com

Thursday, October 20, 2005

مولود

عايش لمين
للحب و لا للشوارع اللى ممبطلش امشى فيها
من كتر ما عشقتها
و لا للناس اللى حامل همهم حتى لو
عمرى ما قابلت حد فيهم
بس الهم واحد طالما مكتوب فى بطاقته انسان
عايش ليه
للكتب اللى مالية البيت القديم
والروايات اللى امك بتاخدها تولع بيها فرن البوتجاز دلوقتى
ولا عايش للكتاب اللى حافظ اساميهم واعمالهم
ويمكن تاريخ ميلاد مراتتهم
ايه التوهة دى
فين انا من الدايرة الكبيرة اللى انا فىوسطها
فين بكره اللى بتكلم عنه من زمان
فين دلوقتى اللى اتهانت عشان احاول اعرف الناس بيه
تلاتين سنة و الحال هو هو
والكتب متغيرتش
والأغانى على نفس الوتر
الصحاب اتغيروا
للأحسن .....ممكن
للأسوأ......جايز
المهم انهم اتغيروا
وانت لسى فى الحدوتة القديمة
حاول تتغير
زى ما الأغنية اللى بتحبها حبيبتك القديمة ما بتقول
احلم
حاول
اكيد فى احسن فى اللى جاى

احساس

كنا صايعين فى شوارع القاهرة لما جالو الخبر
كان لسى بيدور على حتة امل يتعشى بيها ويسد جوعه القديم
لأى حاجة حلوة تحلى مرارة يومه
خالد عرف الخبر قبليه
و سالنا نقوله ولا لأ
اول ما عرف الخبر قرر اللى كنا خايفين كلنا منه
قرر يسيب حلمه والحاجات البسيطة اللى قدر ينقشها فى وسط
مهازل القاهرة الثقافية
قرر انه ينسى الماضى و ينسى بكره
ويرجع بلده
قال ببساطة كشك ابويا مستنينى
وحارة مسعد هتهنينى
قرر ينسى كتب السيما وليل المسرح
حاول ينسى قهاوى الليل
حاول ينسى حلم تملى كان جواه
انه يغير بلد وحياه
سامح احمد مكنش مصدق
مقدرش يتصوروا قاعد فى كشك على الترعة
قالى اززاى
ليسانس اداب
وحلم كبير
وموهبة اكبر
ومخ قرا الف كتاب
اخره الترعة وحارة مسعد
اخره كشك قديم على ناصية
وساب القهوة
وباس الشوارع
حضر شنطة بسيطة زيه
حجز القطر لبكره الفجر
وساعة ما جه يسلم على شلة حلمه وشفنا عينيه
قلنا مش هو
راحت لمعة جوا عينيه
راحت رعشة صوته وايديه
قال يا ولاد استنوا شوية
نسيت اسلم عليه
قلنالو مين
قال النيل
اول صاحب من يوم جيت
واخر حضن قبل ما اسيبكوا
وارجع تانى جنب البيت
قلنا هو

Wednesday, October 19, 2005

قبل ما اروح

قبل ما اروح قلت اعدى على السيبر اللى تحت بتنا شوية
فتحت اميلى اشوف مين افتكرنى وجيت على بالوا
الواد اللى على شمالى بيسمع نانسى عجرم
والواد اللى على يمينى بيتفرج على عمرو خالد
التناقض اللى مالى حياتى مش سايبنى حتى فى النت
شفت اخويا من ورا الأزاز نازل يجيب عشا
عم محمد البواب لسى بيشرب شيشة على اول الشارع
افتكرت احمد >كى فى فيلم البيه البواب
كنت بحب احمد >كى من زمان
وكنت بحب صفية العمرى
عشان عيونها كانت بتفكرنى بعيون ابلة الحساب وانا صغير
كنت بقول لأصحابى لما اكبر هتجوز ابلة الحساب
كنت فاكر ايامها ان الناس الوحشة موجودة فى الأفلام بس
دلوقتى عرفت انهم اكتر من الناس الكويسة

تمشية

الشوارع زحمة والخلق فى كتاف بعض
وكل ام مزوقة بنتها طمعانة فى عريس يمكن يفك الزنقة
والبنات بتتفنن فى اللى تعرى اكتر
الشباب فى القهاوى وعلى النواصى مفيش قدامه الا الفرجة
ولعب الطاولة و شد الأنفاس
الحلم موجود والهدف بردك موجود
طب ايه اللى مش موجود
ايه اللى ناقص عشان الحلام تسيب ارصفة القهاوى
وتسكن حضن الواقع
وتعشق صحابها فى الشوارع والمواقع
جوز عيال بيلعبوا كورة فى شارع جدى القديم
فكرونى بزمن
وانا قدهم فى نفس المكان
ونفس التقسيمة
وجايز نفس الكورة
نفس الناس فى البلكونات بتتفرج
وكوباية الشاى الخلصانة واقفى على سور البلكونة من عمر
صوت عربية الروسى بتاعت جارنا الشيوعى حافظها
منها
بعرف انه جه وهو لسى فى اول الشارع
كان بيكلمنى زمان عن ماركس ولينين
دلوقتى معدش بيكلمنى فى حاجة
جايز حس انى ممكن اوديه فى داهية
ما انا لسانى فالت زى امى ما بتقول من زمان

Tuesday, October 18, 2005

مهشقة

كتير كل ما افتكر زمان
اللى مشى وروح بسرعة زى كل الحاجات الجميلة فى حياتنا
اخس بالشىء اللى بيقولوا عليه شجن
وفى ناس تانية بتقول عليه حنين
كل ما افتكر انى من عشر سنين
كنت زى ما انا
نفس المزاج
والصحاب
وهى هى الأخطاء
بحس بالأحباط مالى عليا حياتى
و اقول انا الدنيا مش سيعانى من القرف
كل ما يجى عيد ميلادى كل اللى بيعرفونى بيفرحوا
الا انا بحس انى كل ما ب>يد سنة ب>يد حمل عمرى انا
وليد الفرباوى صاحبى اللى كنت بقول عليه هايف
ومكبر دماغه من الدنيا
و مسمعش عن صلاح جاهين ولا عمره سمع عن منير
اتجوز وبقالو بيت
و انا لسه قاعد على قهاوى البحر اتكلم عن فيروز وتجربة الشيخ امام
اميرة اللى كانت معايا فى الكلية
وكانوا بيقولوا عاليها مشيها بطال
و هى فغلا كان مشيها بطال
دلوقتى شغالة فى بنك امريكانى
و انا لسه نايم فى كتاب شخصية مصر

Saturday, October 15, 2005

حالة

اجلس وحيدا ليللا
صوت فيروز ياتينى من بعيد
صوت اخى القادم من اول الشارع
يصلنى مذدانا بالشتائم
التى يفخر بها من قبيل الرجولة
حلم الليلة السابقة
يمر طيفه امامى
بنت الجيران اللى فكرانى بحبها
عشان كل ما عينها تيجى فى عينى
تلاقينى ببصلها
العبيطة متعرفش انى بتفرج على جسمها
الكشك اللى تحت البيت اللى عمره ما بيجيب سجاير فرط
ومصمم يخلينى اكرهه
علبة الحلاوة اللى خلصت
ساعة ما حسيت ان نفسى فيها
المدونة الجديدة
لونها مش عاجبنى بيفكرنى بالشجرة اللى تحت البيت

delesepsee

اول مرة

اول مرة
اول مرة تروح المدرسة
اول مرة تركب عجلة
اول مرة انزل البحر
اول خناقة مع صاحبك
اول سيجارة تشربها
اول بنت تفهم عينيها اللى عمرها ما شافتك

اول مرة
وشعور اول مرة
عارفينه كوكتيل الخوف والرهبة مع الأمل الصغير

بس المرة دى تختلف
ماشى اول مرة ادون
لكن مش اول مرةاكتب
ومش اول مرة اجى هنا
لأ دا انا ضيف قديم ومتابع العالم ده
يا ريت ابدا اول تدوينة ليا
بكلمة واحدة
اللى قالها منير من زمان
بنتولد
ومع بعض
هيتولد الأمل اللى راح

delesepsee